世界盃外圍賽南美洲區，巴西主場迎戰智利。今仗屬於例行公事，因為巴西已提早取得出線權，智利篤定出局，所以巴西主帥安察洛堤並冇徵召雲尼斯奧斯祖利亞等4位「皇馬子弟兵」，明顯想趁機試陣及觀察其他球員表現，未必搏盡。兩隊近8次對賽有7次上半場打和，不妨再博半場和。
（HOY TV 77台周五早上8時30分直播）文:Mic少
巴西今次大軍名單，只有巴塞隆拿翼鋒拉芬夏比洛尼一位西甲兵，皇馬4子雲尼斯奧斯祖利亞、洛迪高高斯、安迪歷、艾達米列達奧都榜上無名，據悉「肥安」太熟悉呢幾位「銀河艦隊」舊部能力，唔需要再花時間了解佢哋，寧願畀機會其他球員入選，希望搵最強人腳踢明年決賽周，試陣味甚濃。
此外，曼聯前鋒馬菲奧斯根夏受傷退隊，安察洛堤或會用近況大勇嘅車路士射手祖奧柏度擔正，但呢位23歲新星僅有3次國家隊上陣經驗，能否發揮出球會水準，實屬疑問。
智利提早出局戰意成疑
至於智利喺世盃外踢16場只有2勝4和10負排包尾，成為南美洲區首支出局球隊，主帥哥杜華首要工作係重建球隊，試用更多新人，勝負並非重點，加上實力有限，亦難以對巴西防線構成太大威脅。既然雙方同樣戰意成疑，半場和值博。
