世盃A組「墨西哥賽區」，南韓對捷克，亦係今屆首場早餐波，雙方實力接近，加上屬於首輪賽事，相信會踢得比較謹慎，避免輸壞個頭影響爭出線機會，預料兩隊上半場會先互相試探虛實。而且南韓向來比較慢熱，跨屆近4場世界盃分組賽有3次上半場打和，首選半場和。
(Now 618及616周五早上10時直播)文:Mic少
南韓屬於世盃常客，已經連續11屆出戰決賽周，但只有3屆晉級淘汰賽，為免再次分組賽止步，應會採取保守戰術，就算未能勝出，亦要力保不敗，否則爭出線會非常困難。由於南韓星級射手孫興民已經33歲，需要小心分配體力，佢經驗豐富識得留放，上半場會慳住踢。進攻中場李康仁只屬於巴黎聖日耳門副選，上陣時間唔多，狀態成疑不宜高估。南韓上場熱身賽僅小勝薩爾瓦多1比0，估計難以喺捷克身上取得太大優勢。
至於捷克闊別4屆之後，再次出席世盃決賽周，隊內大部分球員都係效力緊本土聯賽球會，缺少大牌球星，最具知名度只有韋斯咸中場湯馬士蘇錫克及利華古遜前鋒柏德列舒希克，整體人腳經驗比較輸蝕，相信今場唔會冒進。
舒希克單天保至尊
此外，捷克太依賴舒希克入波，一旦佢被對手嚴密看管，勢必嚴重影響攻力，屆時或會出現拉鋸局面，半場和值博。
