世盃聽日凌晨正式揭幕，今屆破天荒由美國、加拿大及墨西哥三國合辦，104場激戰史上最多，並且有多個開波時段，球迷們今晚開始、盡情開P！
揭幕戰墨西哥強細起非
全球引頸以待嘅世盃開鑼，揭幕戰A組墨西哥主場迎戰南非。墨西哥攻守均衡兼有主場之利，預料可以控制戰局，不過南非肯定屯重兵防守，墨西哥破密集能力一般，今場隨時出現老鼠拉龜情況，「辣椒仔」可勝而不穩，倒不如向2.5球入球細埋手。
（Viu TV 99、Now 618及630周五凌晨3時直播）
由於今屆12組入面，8支小組最佳第3名都可以進身淘汰賽，相信球隊都會先適應氣氛及比賽節奏，預料唔少賽事入波唔多。今場係2010年揭幕戰翻版，當時南非主場，先入1球之下被墨西哥逼和，今次主客對調，預計墨西哥會佔到甜頭，小勝機會多。
南非要適應高原非易事
事實上，墨西哥喺世盃首戰大多踢穩陣波，對上8屆都殺入決賽周，當中6屆嘅首場分組賽，總入球開2球或以下。墨西哥進攻靠控制中場，將皮球送去邊路，靠翼衞傳中畀魯爾占美尼斯或辛迪亞高基文尼斯等做終結者，但預計南非會防守為主，要成功創造機會難度會增加。
南非原定5月31日出發去墨西哥備戰，但部分球員及官員簽證出現問題，要延後行程影響備戰，尤其今場艾茲提卡球場位於海拔2,200米，南非其實要盡早適應高原效應，球員體力唔多唔少會受影響。南非26人大軍當中，19人來自國內聯賽，並冇球員國際賽入波數字多過12球，今場料縮後博1分，入球細高唱入雲。
