今輪英超上演「玫瑰打吡」，列斯聯主場激鬥曼聯，兩軍歷史積怨甚深，每次交鋒都以擊敗對方為榮，爭勝戰意特別強，預料會豁出去鬥攻。尤其係列斯聯近3次主場出擊，合共轟入10球，火力強勁，加上曼聯近9次作客總入球全開3球或以上，最好揀中位數2.5球嘅入球大。（Now 621周日晚8時30分直播）文:Mic少
列斯聯搶分護級鬥攻
雖然列斯聯屬於護級分子，但近期表現絕對唔失禮，已經連續6場不敗，包括主場以3比1擊敗車路士，打和利物浦3比3，上仗造訪晏菲路球場再鬥「紅軍」，一樣有分落袋，證明並非虛火，亦反映球隊搶分護級決心十足。列斯聯最大爭勝本錢必定係前鋒卡維特利雲，呢位28歲英格蘭射手狀態大勇，近7場上陣其中6場取得入球，合共有7球進帳，遇上防線不穩嘅「紅魔鬼」，好大機會又有波入。
另邊廂，曼聯缺少般奴費南迪斯、麥比奧莫等多位球員，整體實力難免受削，但「紅魔鬼」被睇淡之下，往往有超預期發揮，隨時會帶來驚喜，例如今季長居後備嘅約舒亞舒克斯上仗擔任正選就立即入波。左閘柏德列多古近期客串踢翼鋒，亦有出色表現，近3次上陣入1球及1次助攻。曼聯正在力爭打入前4位，戰意有保證，加上對手係宿敵列斯聯，更加唔會退縮，雙方有望合演入球騷。
