英超「超級星期天」好波連場，曼市雙龍出海，頭場上演「玫瑰打吡」曼聯作客激鬥列斯聯，兩支傳統宿敵交鋒，面子攸關肯定搏盡爭勝。壓軸之戰有「雙藍會」曼城主場對車路士，「車仔」主帥馬利斯卡日前突然離隊，球隊群龍無首，「藍月亮」能否乘虛而入，全取3分，大家拭目以待。文:法達斯維
今晚英超壓軸戰上演「雙藍會」，曼城主場硬撼車路士。「2哥」曼城上輪大意失分，為爭冠今仗不容再失，咁啱撞正「車仔」突然易帥，依家群龍無首，「藍月亮」仲唔趁佢病攞佢命咩，主勝有計。（Now 621及611周一凌晨1時30分直播）
車仔陣前易帥立立亂
曼城於上周中英超快車造訪新特蘭，雖然全場撳住嚟砌，但最終互交白卷，各項賽事8連勝亦告斷纜，講真「黑貓」今季聯賽主場仲未輸過，曼城贏唔到都唔算羞家，不過畀榜首阿仙奴乘機甩開，如果想爭標就再冇失分空間。「藍月亮」兩名傷兵洛迪卡斯簡迪同埋謝利美杜古，上仗亦有後備落場，連同艾寧夏蘭特、菲爾科頓、卓基等，人腳更充裕，今仗3分志在必得。
咁啱得咁蹺，車路士喺元旦日正式宣布同主帥馬利斯卡協議分手，無論佢係因為權鬥敗走，抑或係預備接哥迪奧拿棒未來執教曼城而走人，短短1個月，「車仔」從大勝巴塞同逼和阿仙奴嘅大勇狀態，到近8仗只得2勝3和3負，可見內亂確係有影響，今仗暫由U21教頭卡林麥法倫領軍，仲未計左閘古古列拿未好番及中場摩西斯卡些度仲坐緊波監，不宜樂觀。加上雙方近3次正式賽事碰頭，「車仔」全部輸晒，今仗睇嚟都係凶多吉少。
