曼城喺阿仙奴開波前5個鐘，主場先對韋斯咸。經過領隊哥迪奧拿一輪調教，「藍月亮」已經重啟「追分模式」，近7場聯賽贏6場，當中近4次主場賽事更全部半場領先，「錘仔幫」一向畀曼城恰死，今場唔使左諗右諗，熱捧曼城半場主勝當收息。■（Now 621周六晚11時直播）文:渡邊年
「藍月亮」追至落後榜首阿仙奴僅2分差距，聖誕新年檔期係一個重要關口，經驗豐富嘅哥帥將會保持現有聲勢，今場贏波就可以坐陣英超榜首，兼且畀到壓力「兵工廠」。
錘仔再陷不勝循環
要揀曼城真係數據多到爆，佢哋近19次喺英超鬥韋斯咸，豪取16勝3和，包括近5次全部最少攻入「錘仔幫」3球，其中挪威鋒霸艾寧夏蘭特就射入7球，而且「藍月亮」習慣喺主場搶攻，相信今仗會繼續先聲奪人，爭取上半場領先。
韋斯咸早前換帥，紐奴領軍下上月初一度連勝紐卡素及般尼，可惜勢頭未能持續，近5仗又陷入3和2負不勝循環，特別係上輪對阿士東維拉領先下反輸2比3，士氣大受打擊，今仗作客曼城，以佢哋脆弱防線，隨時半場都頂唔住，曼城半場主勝熱都要捧場。
