英超焦點戰，「3哥」阿士東維拉作客硬撼韋斯咸。維拉弗到冇朋友，聯賽贏到開巷，勒都勒唔住，造訪打回原形嘅「錘仔幫」仲唔食住上咩？讓球盤維拉讓平半，寧買當頭起，一於捧上盤。（Now 624周日晚10時直播）文:法達斯維
韋斯咸4仗不勝打回原形
講到依家英超最弗球隊，非維拉莫屬，雖然季初一度各項賽事頭6仗不勝，幸好主帥艾美利夠硬淨，帶領球隊走出谷底，各項賽事近16仗豪取14勝2負佳績，當中打出一波5連勝，另一波就係近期錄得嘅8連捷，單計聯賽近10場錄得9勝1負，當中手下敗將不乏曼城、阿仙奴、熱刺等強隊，成功殺上第3位重返爭標行列，而近5輪更加贏晒添，唔講得笑。
另邊廂，護級分子韋斯咸之前曾經試過聯賽2連勝，可惜「小陽春」過後，近4仗聯賽只得3和1負，打回原形。「錘仔幫」最大問題係防守欠穩，已經連續12場有失波，前線嘅查洛保雲、哥林威爾遜表現又時好時壞，正宗攻不銳、守不穩，就算今仗有主場之利，但無論遇上實力、信心、士氣都喺佢哋之上嘅維拉，注定冇運行，上盤有計。
