英超前列大戰，水晶宮主場對曼城，「倫敦奇兵」水晶宮今季異軍突起，近4場聯賽3勝1負，已進身前4位，成為爭奪下屆歐聯入場券要角，愈踢愈有信心，無懼同對手搏拳。至於曼城亦要搶分爭標，神鋒夏蘭特銳不可當，踢法必然進取，但防線不穩存在隱憂；考慮到雙方近6次聯賽交鋒，有5次總入球開4球或以上，首選中位數2.5球嘅入球大。（Now 622周日晚10時直播）文:Mic少
雙方上屆英足盃決賽碰頭，水晶宮爆冷贏波捧盃，今仗重遇手下敗將，球員心理上有優勢。事實上，水晶宮即使星味欠奉，但勝在實而不華，並且踢法夠膽識，即使鬥強隊，亦唔會刻意防守，甚至會主動出擊搶攻，不時為球迷創造驚喜，包括大勝阿士東維拉3比0，以及贏利物浦2比1。
水晶宮中前場球員攻門把握力甚強，最犀利武器一定係前鋒桑馬迪達，呢位法國國腳今季踢15場英超有7球進帳，相信可以對曼城防線構成重大威脅。
藍月防線不穩易失波
另邊廂，剛於歐聯作客以2比1擊敗皇家馬德里嘅曼城，正在力追聯賽榜首阿仙奴，今仗隨時先發制人。曼城整體實力佔優，尤其係前鋒艾寧夏蘭特銳不可當，英超15戰入15球，加上謝利美杜古、菲爾科頓等鋒線球員亦具備優秀射術，令對手防不勝防，近3場聯賽全勝，合共轟入11球，盡顯強大攻力。
不過「藍月亮」防守表現卻令人不敢恭維，早前對列斯聯、富咸，都係領先之下突然防線崩潰，最終分別險勝3比2及5比4，令球迷飽吃驚風散，今場博2.5球入球大為妙。
