今晚英超頭場，白禮頓主場迎戰韋斯咸。「海鷗」踢法豪邁，上仗同阿士東維拉搏槌，創出總入球「7+」，近6次主場總入球全開3球或以上；「錘仔幫」為護級搶分亦唔會縮，首選中位數2.5球嘅入球大。（Now 621周日晚10時直播）文:Mic少
白禮頓整體實力不俗，尤其主場往往有出色發揮，今季頭6場聯賽主場取得4勝2和，包括以2比1反勝曼城，直至上仗3比4輸畀維拉，先被破主場不敗身，查實佢哋上場一度領先兩球，可惜防守始終不穩導致輸波。事實上「海鷗」攻強守弱特性，早於前任領隊迪薩比執教時已形成，靴斯拿上年夏天接手後，至今並冇帶來太大改變，主場長追大盤有着數。
韋斯咸搶分護級唔會縮
目前位處「降班區」嘅韋斯咸9月底由紐奴執教後，表現漸入佳境，上場作客逼和曼聯，近5場聯賽取得2勝2和1負，踢法亦相當進取，頻頻製造大比數賽果，包括以3比1擊敗紐卡素、贏般尼3比2，以及打和般尼茅夫2比2，可見「錘仔幫」搶分決心非常強，作客唔赦鬥攻。
