新一季英超開鑼，首輪立即上演「仙魔大戰」曼聯主場火併阿仙奴，「紅魔鬼」曼聯鋒線大換血，預料需要時間磨合，或會影響季初進攻水準。至於阿仙奴近期熱身賽成績一般，仍未恢復十足狀態，估計會以穩陣踢法行先。加上兩軍近4次正式賽事交鋒，總入球全開2球或以下，一於繼續追捧中位數2.5球嘅入球細。（Now 621及611周日晚11時30分直播）文:Mic少
曼聯今夏大舉增兵，包括簽入3位前鋒馬菲奧斯根夏、麥比奧莫、班捷文施斯高，打造全新「三叉戟」。不過3人未曾同場合作，默契肯定不足，尤其是班捷文施斯高剛加盟，今仗有冇足夠狀態比賽成為疑問。況且，原有前鋒海倫已被「雪藏」準備出售，缺陣上場熱身賽對費倫天拿，該仗領隊魯賓艾摩廉用中場美臣蒙特客串中鋒，效果欠佳，要靠對手擺烏龍先逼和1比1。曼聯鋒線完成新舊交替之前，可能重演上季破門乏力困局。
對家阿仙奴踢咗5場熱身賽只有3勝2負，演出令人失望，其中一個原因係正選人腳有變動，包括簽入兩位中場蘇比文迪及基斯甸洛加特，取代離隊嘅湯馬士柏迪，難免影響攻守流暢度。
「艾師傅」熟晒約基利斯路
再者，雖然「兵工廠」鋒線有炙手可熱嘅約基利斯來投，呢位瑞典射手上場對畢爾包亦有進帳，但始終嗰場波係熱身賽，況且今仗對手、曼聯領隊魯賓艾摩廉係約基利斯「師傅」，熟晒徒弟路，艾帥曾經喺前季歐霸盃16強－士砵亭被阿特蘭大淘汰出局後指：「約基利斯有好多地方需要改進，無論佢面對慢或快嘅中堅，踢法都係冇變，佢對比賽嘅理解有待提高。」有艾摩廉喺度，約基利斯要喺英超處子戰開齋，似乎有一定難度。
阿仙奴喺攻力不足嘅情況下，今仗作客奧脫福，實在不宜高估。睇番兩隊近年對賽，戰局往往陷入膠着，今場入球唔會多，入球細好路。
