今晚東網沙特職直播雙響炮，重頭戲伊蒂哈德對希拉爾，兩隊球星分量十足，伊蒂哈德有賓施馬在陣，希拉爾亦有達雲紐尼斯孭飛，不過近況就有好大分別，衞冕嘅伊蒂哈德早前因為戰績下滑換帥，但未見起色，至於希拉爾近期5連勝氣勢如虹，有力反客為主，客勝有計。
（on.cc東網周六凌晨2時直播）文:邪神
伊蒂哈德上季聯賽奪冠後，會方未有繼續擴軍而選擇「食老本」，加上季前準備不足，搞到季初成績下滑，結果主帥白蘭斯被炒，換嚟葡籍教頭干斯卡奧接手，而呢個改變令隊中「法國幫」受極大影響，要知道賓施馬、尼高路簡迪同穆沙戴亞比3位法國球星都係球隊骨幹，白蘭斯離隊，佢哋作戰心態會否改變仲有待觀察。
伊蒂哈德食老本頂唔住
該隊雖然剛喺亞冠精英盃大勝一場，但只係對手太弱不能作準，而之前淨吞爭標對手艾納斯兩蛋，換帥第一擊亦只能賽和艾費哈，表現令人失望，今場對希拉爾絕對係硬仗，以該隊近況實在唔睇好。
另邊廂，希拉爾狀態明顯較佳，聯賽5戰3勝2和未嘗敗績，攻入15球僅次於艾納斯屬聯賽入球第2多。利物浦棄將達雲紐尼斯轉戰沙職已融入球隊，上場聯賽梅開二度，加盟至今已累積3球，另一位巴西射手馬高斯李安納度更攻入5球，腳風奇順，趁伊蒂哈德陣腳未穩可以贏多鋪，客勝睇高一線。
