世界盃外圍賽中北美洲區第3圈，爭出線形勢相當激烈，C組上演榜首大戰，洪都拉斯主場火併海地，兩隊實力接近，並且同分，相信雙方都會額外謹慎，避免犯錯失波而陷入劣勢，估計今場唔慌多波入。（周二早上8時開賽）
洪都拉斯大部分球員效力本土聯賽球隊，即使去海外搵食嘅國腳，亦只係踢美職等比較低水平聯賽，整體實力有限。因此，球隊採取保守戰術，C組3戰之中，除咗贏實力最弱嘅尼加拉瓜2比0之外，對海地及哥斯達黎加，都係悶和0比0，包括7月美洲金盃在內，近4場有3場冇波入，名副其實踢「悶蛋足球」。
同組尼加拉瓜可保不敗
至於海地近2場合共轟入6球，但對住洪都拉斯，鋒線往往啞火，雙方近5次交手，海地僅有1勝1和3負只入2球，存在格食格情況。加上海地今仗作客更加難發圍，隨時又互交白卷。
同組另一場，哥斯達黎加主場對尼加拉瓜，兩隊同樣踢3場仲未贏過，計埋美洲金盃，哥軍近5場法定時間都打和，估計尼加拉瓜可保不敗。（周二早上10時開賽）
