世盃外歐洲區Ａ組，踢完一半之後意外出現3強鼎立局，大熱門德國同北愛爾蘭、斯洛伐克一樣3戰得6分，今場德國作客北愛爾蘭，勝負對出線權非常關鍵，爭勝決心唔使懷疑。德國攻強守弱，對住主場要搏命嘅北愛多數駁火，1.5球嘅半場大值得推介。（周二凌晨2時45分開賽）文:工廠仔
德國入得又失得
德國上場4比0大炒盧森堡，近2場攻入7球，由域斯同禾達美迪領銜嘅攻擊線有睇頭，不過德國喺拿高斯文帶領下，踢法上有啲有前冇後嘅感覺，對盧森堡係球隊差唔多1年來首次冇失波，近8場有7場都畀對手入到波，今場好大機會都係用強攻代替防守。
北愛爾蘭上輪主場贏斯洛伐克，令出線重燃希望，繼續喺主場出戰當然想乘勝追擊，食住個勢一開波就進攻。睇番北愛爾蘭對上5次同德國交鋒，有4次喺上半場總入球開2球或以上，包括上個月作客德國半場踢成1比1，今場追1.5球嘅半場大好路。
