墨超早餐波有祖亞雷斯主場對托盧卡，祖亞雷斯原本喺墨超表現好曳，但踢北美聯賽盃反而撻着咗，今仗主場出擊有睇頭，對手托盧卡仲堅，北美聯賽盃榜首出線，今場有望同祖亞雷斯鬥攻，加上兩軍近4次交手，半場全部2球或以上，1.5球半場大好路。（周二早上11時開賽）文:渡邊年
祖亞雷斯原本墨超開咧只得2和1負，參戰北美聯賽盃都冇乜人睇好，但點知佢哋好似突然醒咗，3戰1勝2和，2場和波互射12碼1勝1負，同堤格雷斯及普埃布拉一樣總分有6分並列第3，可惜祖亞雷斯勝仗較少，最終只排第5，未能殺入8強。
不過呢段北美聯賽盃賽程，就增強祖亞雷斯上下信心，而且之前佢哋成績唔好，因為要對CF阿美利加及堤格雷斯等爭標分子，實在情有可原，依家佢哋操番起，加上球隊前鋒列卡甸奴停賽刑滿復出，球隊攻力增強。
托盧卡入球停不了
托盧卡係上季次階段季後賽冠軍，7月尾墨超盃擊敗
CF阿美利加捧盃，啱啱嘅北美聯賽盃分組賽，更加2勝1和，以榜首出線淘汰賽，連同之前墨超，球隊近7戰5勝1和1負。托盧卡踢法主攻，呢7場全部有波入，6次半場開2球或以上，加上佢哋近4次鬥祖亞雷斯都係開半場大，值得再追。
