今晚有葡超首輪壓軸戰，波圖主場硬撼甘馬雷斯。波圖上季戰績令人失望，加上早前有名宿佐治哥斯達猝逝嘅刺激，今季決心打爭氣波，遇上「私房菜」甘馬雷斯可旗開得勝，主勝有計。（周二凌晨3時45分開賽）文:法達斯維
貴為葡超3巨頭，波圖近年風頭明顯畀賓菲加同士砵亭搶晒，上季聯賽只得季軍，今季搵嚟法奧利接手，呢位年輕教頭上季執教阿積士，喺大好形勢下竟喺季尾接連失分，將荷甲冠軍拱手讓畀燕豪芬，佢亦引咎辭職，嚟到新環境梗想有個好開始。波圖雖然有法蘭斯高干斯卡奧被祖雲達斯買斷，但仍簽入祖記後衞艾拔圖哥斯達同修咸頓中堅碧拿歷克，有助鞏固防守。
甘馬雷斯未谷起
另邊廂，上季協助甘馬雷斯殺上第6名嘅主帥費爾利，依家轉教葡萄牙U21，後防重心菲臘比利華斯亦改投AEK雅典，影響唔細，睇番佢哋近3場熱身賽只得1勝2負，狀態麻麻。雖然波圖因6月嗰陣要出戰世冠盃，令佢哋較遲開操，但近兩仗熱身賽仍擊敗川迪同馬體會，何況近8次交手，波圖取得6勝1和僅1敗，格食格下有力打響頭炮。
