聽朝世界盃南美洲區外圍賽煞科日最大懸念，係委內瑞拉同玻利維亞嘅附加賽席位之爭，其中委內瑞拉主場硬撼哥倫比亞。委內瑞拉今仗贏波就肯定搶得附加賽入場券，對住無欲無求嘅哥倫比亞，一定先求穩陣，2.5球入球細有計。（周三早上7時30分開賽）文:法達斯維
贏哥倫比亞即鎖定附加賽
現居第7位嘅委內瑞拉已非吳下阿蒙，近年有明顯進步，單計近8次主場出擊，取得4勝4和未輸過，包括賽和兩大勁旅巴西及阿根廷，並有7次開2球或以下，當中有6場保持清白之身，主場踢高一皮波。由於委內瑞拉領先第8位玻利維亞1分，得失球差亦遠遠甩開，今仗贏波肯定以第7位出戰附加賽，必定穩中求勝。
另邊廂，哥倫比亞上仗大勝玻利維亞3比0，依家排第5位兼肯定直入世盃決賽周，既然任務已經提早完成，今仗只屬例行公事，唔慌會搏命。翻查紀錄，雙方近4次正面交鋒，合共只製造3個入波咁大把，全開2球或以下，委內瑞拉今仗力求悶悶地贏，2.5球入球細更好路。
至於玻利維亞主場迎戰巴西，玻利維亞想後來居上搶得附加賽入場券，除咗要自己做好本分贏波，仲要望委內瑞拉失分，形勢被動。更何況佢哋近7次對巴西輸咗6場，就算「森巴兵團」已經出線，玻軍亦未夠本事搶3分，事關巴西新帥安察洛堤都希望爭取3連捷立威，玻軍今仗凶多吉少。（HOY TV周三早上7時30分直播）
