上期執筆時，英國傳媒報導曼聯正全力洽購辛尼拉文斯，到轉會市場最後一天，原來他們有2個選擇，拉文斯和達美安馬天尼斯，最終揀了前者。有不少魔迷都問，以球隊的情況，唔係揀達美安會好一點嗎？
曼聯的確需要一名即戰力門將，達美安的把關技術於英超屬於頂班，更重要他強大的心理質素，肯定可以勝任這份工。做紅魔門將，一定要抗壓力強，一個失誤隨時俾人笑足一星期，達美安無論在阿根廷國家隊和維拉，反而越鬧越起勁，配合其身手，的確是最佳選擇。
但點解唔搵佢？試下從經濟角度入手，達美安剛剛33歲，轉會費據報4000萬鎊，當打8折都要3200萬鎊，以其年紀基本上滿約後只會自由轉會，唔會有餘值。而佢的人工同隊內最高薪的般奴費南迪斯屬於同一檔，即30萬鎊，以球隊目前的經濟狀況，正常要簽多兩年約，將轉會費平均攤分才先可以滿足到財政規例。如果要同一位33歲老將簽4年，周薪30萬鎊的合約，總薪金6240萬鎊；3年都要4680萬鎊，加埋轉會費支出至少8000萬鎊。
買龍門唔會解決到所有問題，花巨資更加唔值。拉文斯雖然有好多未知數，但佢上季極少輸近柱波，應救通常都救到，而且23歲有轉售空間，揀佢係合理選擇。蘇偉業