曼聯季前熱身賽第2站，嚟到挪威作客挪超名牌洛辛堡。「紅魔」集訓已經開始差唔多2星期，訓練量同強度逐步提升，一眾球星嘅入局程度相信增強唔少，今場對住正處於季中、狀態勇猛嘅洛辛堡，戰況會相當激烈，尤其上半場主力互撼，隨時半場就有幾粒入波。
（Now 640周六凌晨零時直播）
曼聯上場喺芬蘭面對英冠球隊域斯咸，意外以0比1輸波，不過「紅魔鬼」嗰場波明顯未在狀態，戰意亦非特別旺盛，只求舒展筋骨，參考作用唔大。隨住世盃結束，曼聯依家陣容其實幾齊整，前場有麥比奧莫、約舒亞舒克斯、美臣蒙特、柏德列多古等球星壓陣，級數唔需要懷疑。
經過上場磨練以及訓練量提升，球隊可望會有更佳發揮，而且備受期待嘅15歲新星JJ加比爾亦已歸隊，球隊火力將會進一步加強。曼聯領隊卡域克希望全隊都有上陣機會，慣例上半場會派出主力陣容，下半場就起用新人，所以上半場必定會全力向對手施壓，入球機會極高。
洛辛堡主場無懼駁火
洛辛堡目前排挪超中游，不過近期狀態有明顯起色，連續兩場聯賽都大勝對手3比0，球員狀態同信心都處於高峰，主場出擊更加無懼同曼聯駁火。洛辛堡本身擅長搶攻，而且佢哋都想下半場留力應付聯賽，相信上半場會主攻，估計會有入球騷睇。
