世盃32強唯一免費直播，澳洲火併埃及，兩隊喺分組賽都只係贏過1場。有「法老王」穆罕默德沙拿壓陣嘅埃及，牌面無疑較高，但佢之前受傷狀態成疑，面對防守緊密球隊往往冇碇埋手，加上入球能力偏弱，對住鬥志高昂兼踢法硬淨嘅「袋鼠兵」難佔甜頭，澳洲受讓平半博下盤。
（ViuTV 99、Now 618及616周六凌晨2時直播）文:工廠仔
埃及對上一次踢世盃淘汰賽已經係92年前，佢哋喺今屆分組賽表現穩陣有餘、驚喜欠奉，3場賽事只係贏過弱旅新西蘭，兩位星級前鋒穆罕默德沙拿同馬莫殊狀態一般，沙拿3場只入1球，延續上季喺利物浦嘅平庸表現，仲要上仗對伊朗傷出，雖然報稱冇大礙，但未必夠弗，而曼城前鋒馬莫殊更未入過波，即係兩個都冇料到。
埃及雙星表現平庸
睇番埃及近4場只有1勝2和1負，贏新西蘭嗰場仲要半場先落後再反勝，贏得冇乜說服力，對住更加硬淨同效率更高嘅澳洲，並冇贏波把握。
連續6屆出戰世盃嘅澳洲，喺分組賽1勝1和1負，防守係佢哋最大武器，今屆3場有2場不失球，防守相當有紀律，爆冷贏土耳其同賽和巴拉圭都縮後防線，壓制對手高速前鋒，再用拿手嘅高空轟炸同死球去製造機會，效果唔差。
澳洲近7場賽事3勝2和2負，上屆佢哋同樣殺入16強，對住最後冠軍阿根廷僅敗，以「袋鼠兵」嘅韌力，有望喺法定時間頂到尾，受讓玩得過。
