世盃淘汰賽展開，今屆賽事擴軍後，出線淘汰賽加到32隊，歷史性首場32強賽事，就係由南非對加拿大！兩隊同樣首次打入淘汰賽，肯定步步為營唔會亂攻，預計入球唔會多，加上南非近5場全開2球或以下，首選2.5球入球細。（Now 618及616周一凌晨3時直播）文:邪神
南非第4次出席決賽周，過去都喺分組賽止步，包括2010年以主辦國身份出戰，結果攞到4分都要飲恨出局。今屆佢哋艱難起步，揭幕戰喺兩人被逐下，淨吞主辦國之一嘅墨西哥兩蛋，小組第2輪喺落後劣勢下，靠尾段獲判12碼，先至驚險1比1逼和捷克，然後喺決定性嘅第3輪1比0擊敗南韓，戲劇性奪得A組次名出線權。
從3場小組賽所見，南非攻守唔算出色，全靠體力化踢法同對手抗衡，實行每個球員多走一步彌補攻守不足，最終絕處逢生殺入淘汰賽，相信呢支非洲球隊今場都會貫徹呢套打法，以最好嘅防守力爭晉級機會。
唔再放煙幕戴維斯出得
加拿大係今屆3支主辦國實力最弱嘅一隊，為咗出線奇招盡出，領隊馬殊先後兩次話艾方素戴維斯可復出，但最終都冇安排呢位主力上陣，被外界指摘係「大話精」，但馬殊毫不介意：「只係利用煙幕令對手諗多咗啫，就算鬧我係大話精都冇所謂啦！我只想盡一切辦法幫球隊攞到優勢，但艾方素戴維斯32強真係踢得。」
冇戴維斯嘅加拿大喺B組首輪逼和波斯尼亞開個靚頭，次輪大炒卡塔爾後出線在望，不過上仗對瑞士就明顯唔多夠班，就算有主場球迷打氣，最終都輸1比2，僅以小組次名出線。最大影響絕對係球隊要離開加拿大主場，今仗移師美國洛杉磯作賽，變相失去主場優勢，而且加拿大同樣初次打入世盃淘汰賽，球員經驗欠奉，相信唔會輕舉妄動，捧入球細係最佳選擇。
