世界盃2026：防線欠穩以攻代守 約旦阿爾及利亞大激鬥_星島日報

世盃J組次輪，同樣0分嘅約旦硬撼阿爾及利亞。呢場對兩隊嚟講絕對不容有失，皆因雙方首輪都出師不利，今場邊個再輸，出線機會就近乎玩完，雙方陣中都有具突破能力嘅球員，但同時後防又唔穩陣，預料會以攻代守，搏拳之下2.5球入球大係最佳選擇。（Viu TV 99、Now 618、616及馬會指定場外投注處直播）文:渡邊年

約旦以1比3輸畀奧地利，而阿爾及利亞更慘吞阿根廷3蛋，兩隊不約而同第一場就失3粒，防線明顯欠穩。最大問題係雙方都冇分喺手，今場和波對大家都冇好處，既然明知對方後防唔掂，倒不如疊埋心水強攻博3分。

約旦攻力有改善
約旦近年喺亞洲賽場進步神速，戰術主打防守反擊，艾利奧雲擁有不俗射門觸覺，上場亦攻入奧地利大門為球隊破蛋，配合效力法甲雷恩嘅翼鋒艾達馬利，有機會喺阿爾及利亞身上偷雞。不過，「沙漠戰士」阿爾及利亞陣容及進攻力量肯定喺約旦之上，球隊大部分球員喺歐洲球會效力，而且前場有經驗老到嘅馬列斯坐鎮，個人質素同撕破防線嘅能力毋庸置疑。

現時阿爾及利亞客W偏熱，但兩隊後防始終信唔過，加上雙方都有唔錯嘅攻擊球員，考慮到約旦近6場5次開3球或以上，入球大似乎係更佳選擇。