聽朝H組次輪賽事，烏拉圭硬撼佛得角。烏拉圭連場不勝，攻力疲弱係致命傷；佛得角首輪守和西班牙贏盡掌聲，今仗有力頂住烏拉圭，讓球主客和有得受讓咁筍，讓球客勝（+1）咪走寶。（Now 618及616周一早上6時直播）文:法達斯維
烏拉圭係少數世盃前冇安排「拍跳」嘅球隊，由4月踢完熱身賽後，就直接出戰決賽周，首輪畀亞洲球隊沙特阿拉伯先入波，面對鐵桶陣久攻不下，直到末段靠麥斯阿拿奧祖執死雞扳平，搶番1分。
烏拉圭攻力弱到喊
雖然呢支南美勁旅由名帥比爾沙執教，但問題多多，箭頭達雲紐尼斯因外援名額所限，被所效力嘅希拉爾除名，除咗3月國際賽外，幾個月冇波踢，明顯未搵番對射門鞋，其他前鋒又唔爭氣，難怪近5仗只得4和1負，入得3粒咁大把，攻力不濟。
另邊廂，世盃新丁佛得角首度亮相即一鳴驚人，上仗守和奪標熱門西班牙0比0，取得球隊世盃史上第1分，最突出梗係40歲門神禾仙夏，全場作出7次撲救，成為世盃史上處子戰零失球最老門將，更喺IG大量吸粉。呢支非洲球隊近況唔錯，之前8仗法定時間取得3勝4和僅1敗，非常硬淨，要守住狀態麻麻嘅「烏圭」冇難度。
