世盃A組次輪另一場賽事，捷克對南非，雙方首輪都輸波，為爭出線今場交鋒變成生死戰，同樣不容再失，必定豁出去鬥攻搶分。考慮到捷克中前場球員攻門把握力不俗，但防線不穩，導致出現近6場有5次總入球開3球或以上，最好博2.5球入球大。
（Now 618及616周五凌晨零時直播）文:Mic少
A組4支球隊之中，捷克同南非實力比較弱，估計只能爭奪其中1支小組最佳第3名出線席位，兩軍都視對方為搶分目標，相信唔會退縮。其實捷克上仗整體演出不俗，更率先攻入南韓大門，但後防比較鬆懈，導致連失2球以1比2落敗。
由於形勢所逼，預料捷克今場會踢得更進取，隊內亦不乏進攻好手，前鋒柏德列舒希克今季為利華古遜上陣42場入22球，中場湯馬士蘇錫克後上攻門亦相當有威脅，今場要攻破南非大門機會甚高。
唔再保守力爭士哥
南非上場0比2不敵東道主墨西哥，好大程度上怯於對手主場氣勢，惟有採取保守踢法。加上耶耶薛度利及另一中場薛華尼下半場領紅被逐，踢少2人自然難逃一敗。不過，今場情況完全唔同，南非為出線無懼同捷克駁火，就算贏唔到，都起碼要入波破蛋向球迷交代，可望合演入球騷。
