世盃外歐洲區E組，保加利亞主場對出線大熱西班牙，兩隊實力有極大差距，新星輩出嘅「狂牛兵團」為展現霸氣，近期大踢進攻足球，一眾生力軍為上位搏到盡，用超強火力輾壓對手。今場西班牙有望大開殺戒，捧3.5球入球大穩陣。
（周五凌晨2時45分開賽）文:工廠仔
西班牙自上年歐國盃奪冠後，加速年輕化進程，18歲翼鋒拉明耶馬已成球壇頂尖巨星，加上尼高拉斯威廉斯、費明盧比斯等攻擊手上位，領隊富安迪斯戰術更進取，近期賽事頻頻狂攻，幾乎去到「有前冇後」地步，6月份歐國聯對兩支勁敵法國同葡萄牙，合共攻入7球。不過，西班牙條防線並唔穩陣，攻力驚人之餘亦出現唔少失波，導致近5場總入球全開4球或以上。
保加利亞防線頂唔住
另邊廂，東歐球隊保加利亞積弱多年，對上一次打入世盃決賽周已經係1998年，依家已經係歐洲三流球隊，上場熱身賽就吞咗希臘4蛋，上年亦試過畀北愛爾蘭炒5球，脆弱防線對住以攻力強勁見稱嘅西班牙，恐怕無力招架，隨時會再次大敗。
