世盃Ｈ組賽事，沙特阿拉伯大戰烏拉圭，兩隊喺決賽周前嘅狀態都唔好。沙特喺今年4月陣前易帥，新請嘅希臘教頭當尼斯臨危受命，只係領軍3場就要應付決賽周，今場必定穩陣行先；烏拉圭實力今非昔比，華麗鋒線已不復再，今場開2.5球入球細機會高。（Now 618及616周二早上6時直播）文:工廠仔
南美代表守強攻弱
沙特近年重金發展足球，沙職搞到有聲有色，不過國家隊嘅管理就問題多多，近年頻繁換帥影響表現，用名牌文仙尼執教效果麻麻，搵連納特回巢又唔滿意，最終搵喺沙職執教多年嘅當尼斯領軍，佢喺2星期前先首次帶沙特比賽，勝在對球員熟悉，最近2場熱身賽對波多黎各同塞內加爾都保持不失，防守力有明顯改善。今場面對強敵烏拉圭，相信會以不敗為大前提，防守至上。
烏拉圭近年以星級鋒線聞名，但隨住蘇亞雷斯年華老去冇份入選、達雲紐尼斯喺沙職慘「被消失」，依家狀態低迷，球隊火力即刻大打折扣。領隊比爾沙奉行高壓逼搶，防守有保證，呢支南美球隊中後場有唔少工兵球員，賓坦古亞、曼紐爾烏加迪等效率雖強，但係守強攻弱。烏拉圭近4場有3次開2球或以下，今場博入球細最好路。
