世盃奪標大熱西班牙，聽朝喺墨西哥中立場，搵秘魯作最後「拍跳」。「狂牛兵團」日前對住伊拉克竟然贏唔到，認真失威，今仗對住陪練嘅秘魯，誓要贏番場好好睇睇壯行色，加上佢哋一開波就搶攻，初段實多波入，中位數1.5球嘅半場大咪錯過。（Now 618及630周二早上10時直播）文:法達斯維
西班牙於2024年重奪歐國盃，上年又殺入歐國聯決賽，加上有未來球王拉明耶馬助陣，難怪成為今屆世盃奪冠大熱門。由於耶馬仍有傷在身，要留番喺決賽周先至搏殺，對「狂牛兵團」點都有啲影響，好似日前熱身賽對住實力麻麻嘅伊拉克，竟然被逼和1比1，雖然主帥富安迪派出多名未有入選世盃大軍名單嘅球員上陣，包括干沙路加西亞、沙治奧高美斯等，令人費解，但堂堂大熱門咁樣都贏唔到，真係乜嘢飛士都冇晒。何況今仗係出戰世盃前最後1次練兵機會，梗係想贏番場漂亮勝仗振聲勢，相信一開波即搶攻，佢哋近5場有4次半場開2球或以上，非常搶韁。
冇包袱同狂牛鬥攻
另邊廂，秘魯冇份參加世盃，今仗純粹陪練，不過佢哋近期比賽都冇揸流攤，之前6仗熱身賽，取得2勝2和2負，其中只有1仗食白果，就算對手只係海地、玻利維亞、智利、俄羅斯等，實力偏弱，但都睇得出秘魯幾有鬥心，何況「狂牛」後防唔算穩陣，冇心理包袱下隨時極速入局，半場大更可取。
