國際熱身賽上演歐非對碰，威爾斯主場迎戰加納。「紅龍」威爾斯無緣今屆世盃決賽周，但比賽態度依然認真，今仗徵召強陣練兵；反觀加納自從取得決賽周席位後全隊「躺平」，近6場全部落敗，包括新上任嘅奎羅斯甫接手即吃敗仗，戰意難測，寧捧威爾斯主勝。（周三凌晨2時45分開賽）文:邪神
加納近況曳到爆
先研究加納，該隊實力唔差，擁有湯馬士柏迪同安東尼施美安等頂級球星，去年10月世盃外非洲區I組首名出線決賽周，嚟緊決賽周同英格蘭、克羅地亞、巴拿馬同組，有巴拿馬墊底，出線前景唔差。不過佢哋熱身賽表現令人不忍卒睹，近6場全敗，搞到主帥艾度被炒，急聘葡萄牙名帥奎羅斯上任，但佢上星期首場領軍即吞墨西哥兩蛋，今場作客威爾斯亦難望反彈。
相反，威爾斯雖然連續缺席上屆歐國盃同今屆世盃兩項大賽，但態度正面，主帥比拿美召集強陣練兵，賓戴維斯、尼高威廉斯、丹尼爾占士、班倫莊臣全部就位，為9月開鑼嘅歐國聯做準備，長遠目標係威爾斯兩年後有份主辦嘅歐國盃決賽周，今仗主場出擊戰意毋須懷疑，主勝值得睇好。
