歐霸盃決賽今晚在土耳其伊斯坦布爾中立場上演，由德甲弗賴堡對英超阿士東維拉。今場主角肯定係維拉主帥「歐霸之王」艾美利，佢教練生涯喺歐霸盃錄得4冠1亞，今次將向住個人第5冠進發，維拉臨出發前又喺英超大炒利物浦壯行色，決賽對手只係德甲排第7嘅弗賴堡，阻唔到維拉捧盃，客勝屬信心之選。
（Now 643周四凌晨3時直播）文:邪神
其實除咗艾美利，維拉打歐霸盃算係「降維打擊」，佢哋係上屆歐聯8強分子，兩回合僅以4比5輸畀後來奪冠嘅巴黎聖日耳門。遠至80年代，維拉係81至82年歐聯前身歐冠盃冠軍，就連英國王儲威廉王子都係該隊忠實球迷，加上近年不斷擴軍，預計今晚歐霸盃正係加冕之時。
維拉上場英超大炒利物浦之後，穩奪來季歐聯資格，球隊喺歐霸盃亦展現超班實力，聯賽階段8戰7勝以第2名晉級，淘汰賽階段近6戰5勝，奧尼屈堅斯、摩根羅渣士同約翰麥甘尼一眾進攻主力狀態弗到漏，今場只要發揮正常，加上主帥艾美利嘅經驗同眾多招數，贏波應該冇問題。
弗賴堡防守不穩
弗賴堡今季喺德甲成績一般，能夠打入歐霸盃決賽實屬驚喜，進攻鐵三角伊戈馬坦奴域、基科及鈴木唯人包辦球隊大部分入球，不過鈴木唯人受傷今場缺陣，攻力難免打折扣，而且球隊防守力不濟，失球數字係德甲前列各隊最高，前屆歐霸盃16強更加試過淨吞韋斯咸5蛋出局，對住實力更強嘅維拉，輸波屬意料中事。
