英超爭霸進入最後直路，曼城全速追趕榜首阿仙奴，今輪率先上陣迎戰賓福特，肯定會搏盡爭勝向「兵工廠」施壓。「藍月亮」火力十足，要搶淨得失球差必搶攻，但賓福特嘅快速反擊亦頗具威脅，預料戰情快上快落，博中位數1.5球嘅半場大最明智。（ViuTV 96台及Now 621周日凌晨零時30分直播）文:工廠仔
曼城依家落後緊阿仙奴5分但踢少1場，餘下4場聯賽1分都不能少，仲要期望「兵工廠」失分，先有機會從後趕上，而且兩隊得失球差非常接近，每個入球都可能關乎最終冠軍誰屬。曼城坐擁艾寧夏蘭特、安東尼施美安、卓基等數胡高手，必定全力衝擊賓福特防線，尤其夏蘭特季尾重拾射門鞋，連續3場聯賽都有波入，火力有保證。
曼城最後4場聯賽有3場喺主場出師，目標係全勝兼「盡刷」入球，事實上佢哋喺主場踢法相當搶韁，連續17場主場都能夠喺上半場入波，近5場主場有4次半場開2球或以上，依家佢哋已無退路，相信今場一開波就會全力搶攻，喺主場聲勢下爭取早開紀錄。
賓福特為歐戰駁火
賓福特仍有機會搶奪歐洲賽資格，一眾球員同樣心雄，上場大炒韋斯咸3比0就盡顯決心。賓福特近9場比賽只係輸過1場，而且今季入22球嘅巴西射手伊戈泰亞高，配合丹高奧達拉同奇雲舒哈迪兩隻快翼，反擊力強勁，無懼同曼城駁火，1.5球嘅半場大值得捧場。
