澳職季後賽淘汰圈賽事展開，由常規賽3至6名共4支球隊，以單淘汰形式對壘，分別有奧克蘭ＦＣ主場迎戰墨爾本城，同埋墨爾本勝利主場對ＦＣ悉尼。墨爾本雙雄都係季後賽常客，上季雙雙殺入總決賽，作戰經驗豐富，值得重視。文:邪神
常規賽排第3嘅奧克蘭ＦＣ，主場對排第6嘅墨爾本城。奧克蘭ＦＣ雖有主場之利，但佢哋近況唔理想，近5仗僅得3和2負，季尾階段遭阿德萊德聯後上搶走直入季後賽4強席位，以佢哋近期走勢實在難有作為；反觀上季季後賽總冠軍墨爾本城，提前兩輪確定季後賽席位，養精蓄銳應付今仗，「讓球主客和」仲要受讓，墨城「+1」值博。（無綫myTV Super周六下午1時直播）
勝利悉尼做慣「大」騷
另一場，上季喺季後賽決賽飲恨嘅墨爾本勝利，將會主場對ＦＣ悉尼，常規賽排第4嘅勝利攻力強勁，經常以攻代守，近7仗5次開4球或以上，中場大師桑馬達喺常規賽交出13次助攻，質素超班，預料季後賽繼續有貢獻；常規賽第5名嘅ＦＣ悉尼季尾狀態回落，近7仗僅1勝，不過淘汰賽場合無保留，加上雙方近2次交手全開4球或以上，再追3.5球入球大。（無綫myTV Super周六下午5時40分直播）
