意甲護級大戰，比薩ＳＣ主場惡撼萊切。比薩ＳＣ今場贏唔到就正式宣布降班，不過佢哋護級都係有心無力，近5場輸晒只入1球，撞正萊切同樣攻力不濟，海軍鬥水兵唔慌多波入，熱捧2.5球入球細。
（Now 639周六凌晨2時45分直播）文:渡邊年
萊切火力曳想贏都難
比薩ＳＣ現時34戰只得18分排包尾，萊切就有29分排17位，聯賽剩番4輪，比薩ＳＣ落後萊切11分，佢哋今場唔能夠全取3分，就要提早降班。至於萊切就多過尾3嘅克雷莫納1分，同樣身陷降班漩渦。
雙方近況都唔掂，比薩ＳＣ上場以0比1不敵帕爾馬，聯賽5連敗僅入過1球。萊切其實亦唔叻得去邊，聯賽4連敗之後再2連和，呢6場只係入過2粒，事實上萊切係意甲入波最少球隊，34場聯賽只入過22球，近3場作客更係顆粒無收，相信呢場萊切都唔係一心諗住贏，死守和波就可以搞掂比薩ＳＣ，2.5球入球細熱熱哋，執少少留力周末再搏殺。
