英超榜首大戰，衞冕嘅利物浦主場硬撼上季亞軍阿仙奴。雖然雙方頭兩輪都贏波，不過利物浦贏得辛苦，防守更加錯漏百出。相比之下，阿仙奴表現較平穩，兩戰都保持清白之身，而且近6次聯賽鬥「紅軍」未輸過，讓球客勝（+1）有計。（Now 621及611周日晚11時30分直播）文:工廠仔
利物浦主帥施洛今季一改「養生波」打法，但加強進攻後反而出現攻守失衡，連同社區盾在內，近3場共入9球，但合共失咗6粒，頭2輪聯賽雖連挫般尼茅夫及紐卡素，不過都曾經喺領先兩球下被追和，去到末段先入奠勝士哥，縱使贏波但欠缺說服力，同時凸顯防守不穩問題。
阿仙奴今季踢得更加務實，頭兩輪聯賽全勝之餘，共入6球兼冇失波。儘管夏維斯同布卡約沙卡因傷倦勤，但「兵工廠」今夏大事擴軍，板櫈深度加強，無論係新兵約基利斯、馬度基、伊比爾治伊斯，抑或原有嘅李安度杜沙特、加比爾馬天尼利均可隨時候命，不愁攻力。
近6次聯賽交鋒兵工廠不敗
何況阿仙奴近年喺主帥阿迪達帶領下持續進步，尤其係面對強隊「打不死」，近22次英超對傳統Big 6球隊，錄得13勝9和不敗，包括今季首輪險勝曼聯1比0，同時「兵工廠」近6次聯賽鬥「紅軍」亦獲2勝4和不敗，單計近3次造訪晏菲路球場都和波，的確擅打硬仗，相信阿仙奴今仗能全身而退。
