今晚德盃4強大戰，史特加主場硬撼弗賴堡。雖然兩軍實力不相伯仲，但史特加近況反覆不定，相反弗賴堡近7場贏6場，讓球盤仲有得受讓1球咁筍，一於捧下盤。
（周五凌晨2時45分開賽）文:法達斯維
論人腳，史特加坐擁利維寧、丹尼爾烏達夫、基斯富列治等德國國腳，今季聯賽排名亦較高，近年交手又食住弗賴堡，點睇都係秤先啲。
史特加飄忽多失波
不過史特加近期狀態確係反覆，各項賽事近8仗只得3勝1和4負，其中喺歐霸畀波圖踢出局，佢哋最大問題係防守欠穩，呢8仗失咗14粒，只有2場冇失波，就算有地利亦不宜高估。
相反，弗賴堡近7仗豪取6勝1負，唯一輸畀超班嘅拜仁慕尼黑，仲要係領先2粒下被逆轉，雖敗不辱。何況弗賴堡於歐霸歷史性殺入4強，唔講得笑。弗賴堡雖然冇星味，但勝在整體戰出色，無論係伊戈馬坦奴域、盧卡斯賀拿、基科或鈴木唯人，於今屆德盃都有交出入波或助攻，加上依家士氣正盛，寧買當頭起，下盤絕對咪錯過。
