開季就陷入低潮嘅曼聯，今晚會喺主場迎戰新升班嘅般尼，想爭取英超首勝並唔穩陣，佢哋進攻創造力嚴重不足，幾位貴價前鋒仲未交到貨，面對「泊大巴」嘅般尼好大機會老鼠拉龜，入波能力畀唔到人信心，博2.5球入球細為妙。
（Now 621周六晚10時直播）文:工廠仔
曼聯周中喺英聯盃被乙組球隊甘士比踢出局，士氣極差，全新鋒線成效麻麻，班捷文施斯高、麥比奧莫同馬菲奧斯根夏組成嘅「三叉戟」個人能力強，但球隊進攻戰術單調，只流於單打獨鬥。「紅魔鬼」面對強敵用長傳急攻、跳過中場組織嘅踢法都算係銳利，但面對密集防線即刻威力大減，今場般尼必定擺出鐵桶陣迎戰，曼聯想靠組織入波有難度。
硬朗踢法招呼紅魔
另邊廂，般尼上場聯賽贏完新特蘭，再喺英聯盃贏埋打比郡晉級，球員信心唔差，今場作客會以1分為目標。曼聯面對「泊大巴」嘅般尼，呢種體力化同硬朗嘅防守，「紅魔鬼」經常束手無策；加上兩隊近4次交手，總入球全開2球或以下，今場再開2.5球入球細機會高。
