星期六凌晨意甲，榜首國際米蘭主場迎戰卡利亞里。國米依家榜首建立9分優勢，奪冠機會高唱入雲，想盡早捧盃之餘，亦想擸埋意盃做「雙冠王」，今場會速戰速決準備周中意盃4強，考慮到雙方實力有一定差距，博國米半場主勝夠晒穩陣。
（Now 638周六凌晨2時45分直播）文:工廠仔
國米喺3月份一度跌watt，不過一眾爭標對手唔爭氣，令國米榜首位置未受動搖，踏入4月份接連大破羅馬同科木後，優勢已經拉番開到9分，最後6輪搶多10分就肯定封王，向住冠軍衝刺勒唔住。國米主場踢法進取，近5場聯賽主場有4次半場領先，佢哋下周中要喺意盃4強對科木，今場肯定想盡早鎖定勝局後留力。
卡利亞里遇強凶多吉少
卡利亞里近9場聯賽1勝2和6負，近4場作客只得1和3負，仲未擺脫降班危機。中場主將馬斯迪利喺上場對克雷莫納傷出，今場多數趕唔切上陣，面對實力超班嘅國米凶多吉少。翻查兩隊過去7次對賽，國米有6次喺上半場已經領先，今場一於繼續追半場主勝。
