今晚女子歐聯8強首回合，曼聯女足主場惡鬥拜仁慕尼黑女足。曼聯女足近年進步神速，今次係佢哋首度躋身歐聯8強，經驗肯定唔及見慣大場面嘅拜仁女足。況且實力上雙方亦有差距，拜仁女足目前狀態巔峰，平手盤坐和望贏。（Now 643周四凌晨4時直播）文:工廠仔
曼聯女足遇強即現形
曼聯女足喺今屆之前，只係喺23/24球季踢過1次外圍賽，佢哋陣中有舒卓娜、奧爾美同菲杜蓮娜洛科3名前拜仁慕尼黑女足球員，亦係佢哋大幅進步嘅原因，依家入到8強已經超額完成。
曼聯女足喺聯賽階段以第6名出線踢附加賽，不過佢哋嘅得失球竟然係負數，歐聯表現仍嫌飄忽，面對里昂女足等頂級球隊即時「現形」，顯得難以招架，今場對住實力高強嘅拜仁女足，交學費在所難免。
拜仁女足今屆歐聯，只係喺早段輸過畀巴塞隆拿女足，之後及時振作搶到前4直接出線，近8年第7次打入歐聯8強。睇番佢哋喺分組賽曾擊敗另一英超勁旅阿仙奴女足，實力強橫，加上近況極佳，近10場錄得全勝，全部都炒對手至少3球，霸氣十足，平手盤揀拜仁女足冇甩拖。
