英超最後衝刺場場緊湊，榜首阿仙奴今輪主場迎戰愛華頓。「兵工廠」依家「4線」作戰，連場硬仗之下體能虛耗巨大，每場比賽唔追求華麗奪目，只求順利拎足3分，領先之後隨時守到完場。愛華頓踢法硬淨，有力同疲兵阿仙奴抗衡，博2.5球入球細好路。（Now 621及611周日凌晨1時30分直播）文:工廠仔
阿仙奴依家喺榜首領先緊少踢1場嘅曼城7分，雖然最近聯賽獲得3連勝，但進攻方面仍然冇乜睇頭，上輪作客白禮頓贏1比0，9分鐘領先後，就已經開始拖慢節奏，最後順利捱到完場；之前對車路士又係靠2次角球攻勢贏波，生波嘅進攻組織板斧欠奉，但求實實際際咁「煲魚生粥」就收貨。
阿仙奴喺周中歐聯作客利華古遜，驚濤駭浪下靠完場前12碼逼和1比1，下周中次回合將會成為生死戰，「兵工廠」有後顧之憂下，今場當然唔敢傾盡全力，避重就輕下更加唔好奢望會有咩脫胎換骨演出，好大機會又係靠鋼鐵防守保住唔輸，再搵機會入1粒等收工。
主守愛華頓體力抗衡
另邊廂，愛華頓以踢法硬淨見稱，喺領隊莫耶斯帶領下，更加講究防守效率。「拖肥糖」近期連贏紐卡素同般尼後，球員信心大大增強，抖足1個半星期後，今場肯定會擺定個陣，再用體力化踢法壓逼阿仙奴嘅疲兵，預料戰況會出現膠着。翻查阿仙奴近5次對愛華頓，有4次總入球開2球或以下，今場一於再追2.5球入球細。
