英足盃16強壓軸賽事，韋斯咸主場迎戰「蜜蜂仔」賓福特。「錘仔幫」韋斯咸上仗聯賽擊敗富咸，燃起護級希望，正路嚟計佢哋應該放棄英足盃，專心護級；反觀賓福特企穩聯賽上半版，不過已經冇咩好爭，可以無後顧之憂踢英足盃，加上佢哋作客特佳，近5仗作客4勝1和，客勝屬信心之選。（Now 651周二凌晨3時30分直播）文:邪神
「蜜蜂仔」作客戰績靚
今場刨波重點，不妨研究韋斯咸嘅作戰心態，佢哋依家排聯賽尾3，同森林同分但輸得失球差，與熱刺及列斯聯分數亦喺3分以內，護級機會唔低。對於佢哋嚟講，聯賽最後9輪場場都係生死戰，最緊要搶到分，至於英足盃，相信會抱住贏波固然開心，但輸波都冇壞嘅心態作戰，戰意唔會太強。
至於賓福特就唔同，佢哋聯賽排第7，頂盡都係爭歐協聯、甚至歐霸盃席位，歐聯資格有得爭但機會不大，何況賓福特係selling club，即係賣球員賺錢，既然聯賽搶夠分，佢哋喺英足盃肯定鍊到尾，一眾主力如伊戈泰亞高、奇雲舒哈迪、佐敦軒達臣都會上陣搏殺，再睇埋佢哋近５場作客４勝咁靚仔，一於捧客勝。
