今晚東網直播沙特職大戰，「2哥」吉達艾阿里主場硬撼伊蒂哈德。吉達近期贏到開巷，射手艾雲東尼腳風順到冇朋友，面對客場唔掂嘅伊蒂哈德，實食冇黐牙，主勝有計。
（on.cc東網周六凌晨3時直播）文:法達斯維
今季沙特職認真峰迴路轉，之前希拉爾反壓艾納斯升上榜首，轉過頭又畀艾納斯殺番上嚟，吉達挾聯賽5連勝之勢，亦趁機升上次席，只落後艾納斯2分，冠軍仍係爭崩頭。吉達艾阿里雖然入波唔夠艾納斯多，但箭頭艾雲東尼以23球位居射手榜榜首，而且24輪聯賽僅失15粒，防守冠絕群雄，攻守兼備，加上因局勢緊張令西亞區亞洲賽暫停，令吉達依家可集中火力專攻聯賽。
伊蒂哈德作客勁曳
衞冕嘅伊蒂哈德今非昔比，依家只排第5位，遠遠落後爭標3雄，季中仲有王牌射手賓施馬跳槽去希拉爾，惟有改用安尼斯利出任箭頭，效果麻麻。除此之外，伊蒂哈德客場奇差，12次聯賽作客贏得4場咁大把，單計近6仗作客更加未贏過，造訪連場報捷、矢志爭標嘅吉達艾阿里，實在難有運行，主勝值得捧場。
