麥總缺陣鋒力打折扣
今晚西甲獨腳戲，「2哥」皇家馬德里主場迎戰基達菲。皇馬喺聯賽同巴塞你追我趕，但今場有王牌基利安麥巴比因傷倦勤，攻力難免打折扣，加上近年對住基達菲例少交收，今場但求3分穩陣落袋，唔慌多波入，2.5球細盤更划算。（Now 632周二凌晨4時直播）文:法達斯維
皇馬季中怒炒少帥沙比阿朗素，臨危受命嘅艾比路亞總算頂得住，令「銀河艦隊」聯賽重燃爭標希望，並且順利殺入歐聯16強。雖然呢位名宿領軍後贏多輸少，但又會莫名其妙地輸畀阿爾巴塞特及奧沙辛拿等弱旅，演出飄忽唔多夠霸氣。
「銀河艦隊」近期再收到壞消息，箭頭基利安麥巴比因帶傷上陣一段時間，搞到膝傷問題有惡化迹象，上場對賓菲加嘅歐聯附加賽生死戰都要缺陣，球隊之後亦講到明，「麥總」要完全好番先可以復出，預計佢今仗會繼續休戰，冇咗呢位今季聯賽入23粒嘅首席射手，進攻點都有影響。
基達菲硬淨頂得兩嘴
另邊廂，作客嘅基達菲近5場只係輸過1場，近況相當硬淨，佢哋今季聯賽入得20粒，攻力一般，但勝在防守穩陣，只係失咗29球，喺西甲名列前茅，單計近6仗有5次開2球或以下，加上要搶分護級，今仗一定繼續保守打法，目標有分落袋。翻查紀錄，雙方近8次碰頭，有7次總入球係1球起、2球止，2.5球入球細分頭不俗咪錯過。
