歐聯附加賽次回合賽事，皇家馬德里同賓菲加1個月內第3度交鋒，首回合皇馬小勝1比0，更爆出種族歧視風波，今場火藥味十足。皇馬以歐聯冠軍為目標，肯定唔敢怠慢，喺巴拿貝主場出擊亦係信心保證，無論戰意同實力都高一線，今場皇馬讓1/1.5球，「讓球」照捧上盤。（Now 638周四凌晨4時直播）文:工廠仔
皇馬上月喺聯賽階段煞科戰，戲劇性2比4不敵賓菲加，上星期首回合同樣話題十足，雲尼斯奧斯祖利亞入波之後，指控比列斯迪安尼種族歧視，一度罷踢令比賽暫停。賽後雙方仍繼續針鋒相對，令次回合氣氛更加緊張。雲尼斯奧斯、基利安麥巴比等前鋒怒氣未消，勢必搶攻「出氣」。
皇馬自從艾比路亞接掌帥印後，整體表現有起色，上場西甲雖然意外輸波，但皇馬喺主場出擊非常對辦，近6次喺巴拿貝球場出戰全勝，當中5場贏2球或以上，霸氣十足。再者，皇馬近年面對葡萄牙球隊都有好成績，近6次喺歐聯對葡超球隊拎到5勝，今仗有望再下一城。
摩帥停賽賓菲加群龍無首
賓菲加「掹車邊」殺入歐聯附加賽，教練摩連奴居功至偉，不過呢位葡萄牙名帥喺首回合被逐，今場無緣返巴拿貝倒戈，賓菲加群龍無首，肯定影響臨場應變能力，而且「話題人物」比列斯迪安尼喺賽前亦被歐洲足協罰停賽，今仗無緣上陣。賓菲加形勢上要焗住進攻，皇馬條頂級鋒線大把空間發揮，賓菲加隨時輸得更慘。
