歐霸盃附加賽首回合今晚全面展開，焦點賽事費倫巴治主場迎戰諾定咸森林。森林呢隊波真係英超奇葩，佢哋最近又換帥，今場會由新帥域陀佩利拉作客領軍，新帥對住班球員，分分鐘連邊個打邊個都未分得清；反觀費倫巴治早前簽入尼高路簡迪，近期4連勝，人腳同狀態都對辦，捧主勝財源滾滾。（Now 643周五凌晨1時45分直播）文:邪神
先講森林，佢哋喺7、80年代兩奪歐冠盃，沉寂多年後今季再戰歐洲賽，本來係球壇美事，但衰在佢哋有個黐線班主，希臘富商馬連拿基斯今季亂炒領隊，先後炒咗紐奴、普斯迪高路同戴治3任主帥，域陀佩利拉係今仗賽前先搵番嚟領軍，內部管理一塌糊塗。
至於呢位域陀佩利拉，雖然佢曾經兩度執教土超豪門費倫巴治，但對上一次領軍已經係5年前，對土超有一定了解或者有幫助，不過佢去年11月被狼隊解僱時，當時狼隊只得2分，依家佢既要護級，又要踢歐霸盃，仲有艾利洛安達臣停賽，森林表現如何有數得計。
土超豪門陣容升呢
反觀費倫巴治就正常得多，現時喺土超排第2，早前簽入法國國腳尼高路簡迪，配合前皇馬翼鋒馬高阿辛斯奧同前曼聯中場費特洛迪古斯，陣容全面升級，近期連贏4場表現對辦，對住古靈精怪嘅森林，贏波好合理。
