熱身賽：坦Sir崇尚進攻 開波即搶利華鍊 車等睇入球騷_東方日報

應屆世冠盃盟主車路士，今晚喺主場同德甲勁旅利華古遜「拍跳」。「車仔」眾將復操冇耐唔慌弗，今場志在寓賽於操，相反利華連贏幾場上晒力，新帥坦哈格擅於一開波就搶攻，隨時上半場已大手交易，等睇入球騷。

（周六凌晨2時開賽）

「車仔」上季英超煞科後，休息咗大約兩周，於6月中就遠赴美國出戰新版世冠盃，一路見關過關，最終喺決賽擊敗巴黎聖日耳門封王，即係佢哋喺上月中先正式收咧。話咁快，又要迎接本月中新球季開鑼，都未抖夠就要復操，先唔理眾將有冇出現厭戰情況，單計狀態同體能都未ready，今場先係佢哋首場熱身賽，預計主帥馬利斯卡唔介意贏輸，志在睇吓球員狀態如何。

車路士復操冇耐未有態
另邊廂，利華今夏大失血，除咗教頭沙比阿朗素轉教皇馬外，科利安華迪斯、謝利美費林邦、格列沙加及莊拿芬泰希等主力相繼離隊，前季雙冠王骨幹已畀列強拆爛晒。好彩呢支德甲勁旅及時搵咗坦哈格接手，除咗簽入「紅軍」後衞查洛爾昆沙，亦成功說服首席射手柏德列舒希克續約至2030年，算係穩定到軍心。

同開操冇耐嘅車路士相比，利華已經踢咗4場熱身賽，並取得3勝1負，狀態漸入佳境，而且呢4場半場全開2球或以上，非常搶韁，相反「車仔」志在練兵，唔介意贏輸，坦Sir咁崇尚進攻，隨時一開波就嚟料，今場實多波入。