英超焦點之戰，車路士主場對列斯聯，兩隊各有所求，車路士需要搶分爭入前4位，列斯聯為護級搏命，預料雙方都會採取主攻踢法，尤其係「車仔」由新帥羅仙尼亞執教後，大踢開放式足球，各項賽事近5場有4次總入球開出4球或以上，中位數3.5球入球大回報高值博。（Now 624周三凌晨3時30分直播）文:Mic少
排第5位嘅車路士僅落後第4位曼聯1分，仍有相當大機會打入前4，奪取下屆歐聯入場券，前提當然係要保持贏波。呢支倫敦勁旅狀態不俗，獲得聯賽4連勝，合共入11球，有姿勢有實際。「羅Sir」成為史上第2位教波生涯首4場英超領軍全勝嘅英格蘭籍領隊，證明呢位41歲少帥有料到，球員自然願意為佢搏命。「車仔」現時士氣高昂，加上今仗對手只係下游球隊列斯聯，更加可以放膽主攻，力爭再下一城。
列斯聯護級無懼駁火
至於列斯聯喺上場護級大戰，以3比1擊敗諾定咸森林，現時領先緊排尾三嘅韋斯咸6分，有助提升搶分信心，無懼同車路士硬碰。
事實上，呢支新升班球隊具備不俗攻力，特別係前鋒卡維特利雲狀態勇猛，上場英超又有入波，今季聯賽共有10球進帳，成為射手榜入波最多嘅英格蘭球員，相信可以對「車仔」防線構成重大威脅。兩隊上年12月聯賽首循環交鋒，列斯聯爆冷贏3比1，絕對唔嘢小，隨時又會出現大手交易。
