今晚利物浦同曼城合演「紅藍對決」，兩支班霸近年壟斷英超，喺晏菲路交手唔單止係3分咁簡單，更足以左右榜首形勢，同時影響兩隊下半季走勢，絕對係關鍵「6分波」。文:謝德謙
利物浦近排狀態回勇，由守轉攻速度相當快，可惜後防穩定性仍然差啲，遇到傳控能力強嘅對手時，防線承受壓力依然唔細。曼城踢法依舊以控球為主，場均控球率同傳球成功率保持高水平，領隊哥迪奧拿賽前亦強調，球隊喺高壓比賽下必須保持冷靜同耐性，唔可以胡亂失控球權。
細節處理成關鍵
利物浦上輪雖然反勝紐卡素，但中場覆蓋不足一度陷入劣勢，領隊施洛賽後亦話攻守平衡要改善，可幸「億元先生」域斯已經適應英超節奏，踢出個人應有水平，肯定係「紅軍」近期最有威脅一人。至於曼城上輪聯賽對熱刺半場領先2球，諗住3分穩袋，點知被對手逼和2比2，爭標再遇挫折，射手艾寧夏蘭特似乎未回復最佳狀態。雙方近年交鋒向來節奏明快不乏入波，觀賞性十足，勝負隨時取決於臨場調動同細節處理。
