英超：往績佔優鋒線質素高 車路士Run順撞散韋斯咸_東方日報

今晚英超次輪賽事展開，打頭陣有韋斯咸對車路士嘅「倫敦打吡」。「世界冠軍」車路士首仗被水晶宮悶和，不過整體發揮唔差，操起狀態後可望提升進攻效率，今場對住一盤散沙嘅韋斯咸，近年對賽「藍戰士」都拎足3分，客勝放心捧場。（Now 621周六凌晨3時直播）文:工廠仔

車路士因為出戰世冠盃而延遲開操，上周開咧戰明顯仲未上力，雖然對水晶宮有7成控球率，射門多達19次，但埋門一腳處理仲差少少，以高爾彭馬、祖奧柏度及艾斯迪華奧等攻擊球員嘅質素，「入局」後效率會大大提升，車路士入球能力唔需要懷疑。

錘仔幫立立亂士氣曳
相反，主場嘅韋斯咸依家立立亂，今個夏天失去進攻主力古度斯，但增兵方面未見積極，令球迷非常不滿，盛傳巴西中場盧卡斯柏基達亦有意離隊，上場吞新升班嘅新特蘭3蛋後，要求領隊樸達下台聲音愈嚟愈大，「錘仔幫」依家士氣低落，演出難有期望。

車路士近年專食韋斯咸，翻查兩隊近3次對賽，「藍戰士」全部都能夠順利拎走3分，上季嚟到呢度作客對賽，照樣大勝3比0，可見兩軍實力有明顯距離，車路士想盡快打響勝鼓，今場絕對決心十足，客勝值得支持。