今晚U23亞洲盃季軍戰，越南U23對南韓U23。越南U23打入4強創下8年來最佳成績，但今場陣容不整，對住「小太極虎」勢必捱打，南韓U23無論身體條件同比賽經驗都遠勝對手，加上國內輿論壓力，季軍獎牌對球隊好重要，佢哋近4次對越南U23獲3勝1和，客勝屬信心之選。
（HOY TV 76台周五晚11時直播）文:邪神
越南U23殘陣難捱
越南U23喺呢項賽事最佳成績係2018年殺入決賽，今屆佢哋驚喜打入4強有晒交代，上仗喺備受看好情況下以0比3大敗於中國U23腳下，球隊過分依賴快速反擊、身體對抗性弱，同防守高波能力曳等弱點表露無遺，喺主力中堅阮曉明受傷及范理德停賽下，好難擋得住南韓來犯。
南韓U23上仗惜敗於技術更強嘅日本U23，只能講句技不如人，事實上佢哋今屆表現唔算突出，分組賽階段仲輸過波，飽受國內輿論猛烈批評，今場為面子不容有失，戰意十足下法定時間可KO對手，唔會令捧場客失望。
