今晚意甲戲碼，拉素主場迎戰科木。拉素近期表現低沉，近5場只贏過1次，而且只係1比0僅勝包尾大幡維羅納，表現令人失望，今晚雖然有主場之利，但佢哋殘陣出戰，想贏波難度更大，而且科木防守硬淨，今場好可能分唔出勝負，和波值得一博。（Now 638周二凌晨3時45分直播）文:工廠仔
拉素今季最大問題係鋒力不足，近4場主場入得3粒，連帶成績都曳，只取得3和1負，加上佢哋要殘陣應戰，射手卡斯迪蘭奴斯同中場古安杜斯離隊，翼鋒簡些利亞尼亦搞緊轉會多數避戰，另一前鋒保拿爾迪亞又為塞內加爾踢非國盃，鋒力進一步受削，今場入到波已經偷笑。
科木作客夠晒穩
科木喺西班牙少帥法比加斯帶領下，今季穩定性甚高，對上2場作客取得連勝兼且零失球，不過上仗輸畀ＡＣ米蘭後，近2場主場只係得1分落袋，今場作客會繼續奉行穩陣政策，唔會急於進攻，何況西班牙前鋒艾華路莫拉達缺陣，更加唔敢輕舉妄動。以科木嘅穩健防守，預計頂得住「冇牙老虎」拉素，雙方都冇贏波把握，博和最好路。
