上季勇奪英足盃嘅水晶宮，近期飽受內憂外患困擾，上周六作客1比2輸畀新特蘭後，領隊格拉斯拿向球會瘋狂發炮，直指球隊已被「遺棄」，更唔介意自己喺合約完結前被炒魷。
水晶宮日前證實將馬克古希賣去曼城，令領隊格拉斯拿勁不滿，宣布季尾約滿就會走人。隨住水晶宮輸畀新特蘭，呢位奧地利籍領隊更向球會攤牌：「球員喺場上搏命，但球隊已經被遺棄，得唔到任何支援。我講得出嚟乜結果都唔在乎，只係想保護班球員。或者高層認為拎多幾分就唔使擔心降班，但我知球員唔會滿足，如果管理層覺得今季已經收貨，咁就由得佢，佢哋想我教到尾或者搵其他領隊都冇所謂，因為間球會係佢哋嘅。」
熱刺輸波法蘭克等落鑊
同樣麻煩多多嘅仲有熱刺，佢哋喺今輪「倫敦打吡」，主場以1比2不敵護級分子韋斯咸，仲有後衞賓戴維斯受傷面臨長抖。賽後主帥法蘭克話願意負全責，呼籲球迷繼續支持球員，甚有「告別」味道，佢亦被外國博彩公司列為「下位被炒英超領隊」大熱，僅得1.67倍。
