易帥出征鬥私房菜般尼
今晚英超快車焦點戰，剛易帥嘅曼聯作客硬撼般尼。「紅魔鬼」啱啱怒炒領隊魯賓艾摩廉，暫時由費查做替工領軍，佢嘅目標好簡單，就係鼓舞士氣打場翻身仗，加上撞正「私房菜」般尼，絕對係反彈好時機，客勝咪錯過。（Now 621及611周四凌晨4時15分直播）文:法達斯維
曼聯近5仗贏得1場咁大把，固然戰績不佳，但艾摩廉被炒主因係同高層內鬥，呢樣唔多唔少都影響到內部士氣。如今未搵到新帥，看守領隊費查當務之急，梗係先穩定軍心，球隊希望以佢「紅魔鬼」名宿嘅光環，一洗之前死氣沉沉嘅精神面貌，令眾將重拾信心，盡快贏波重上正軌，平安過渡畀新帥接手。
主隊攻力弱得可憐
雖然任何球隊面對般尼都從來不易，但般尼自己要搶分亦同樣不易，以近8場為例，只得2和6負未贏過，其中3場僅負1粒，可見佢哋不乏鬥志，可惜質素所限，最終徒勞無功。睇番般尼20輪聯賽入得20球，單計主場10輪只入8粒，攻力疲弱係最大問題。
論實力，曼聯遠在般尼之上，就算般費受傷、麥比奧莫等非洲兵未歸隊，但仲有卡斯米路、馬菲奧斯根夏等人支撐大局，根夏近5仗入3粒，狀態唔錯。何況曼聯專剋般尼，雙方近8次交手，曼聯獲6勝2和未輸過，若計近7次造訪般尼，「紅魔鬼」都贏咗6次，明顯格食格，今仗可恃質全取3分。
